जनप्रतिसाद न्यूज नेटवर्क.
(अजित निंबाळकर)
कोल्हापूर, दि.६ : कळंबा कारागृहातील कैद्यांनी बनवलेल्या विविध वस्तू,फराळ,पणत्या व आकाश कंदील भव्य प्रदर्शन व विक्री केंद्राचा शुभारंभ वैद्यकीय शिक्षण व विशेष सहाय्य मंत्री तथा कोल्हापूर जिल्ह्याचे पालकमंत्री हसन मुश्रीफ यांच्या हस्ते करण्यात आला.
दिवाळी मेळावा २०२३ या कार्यक्रमाच्या शुभारंभ प्रसंगी बोलताना मुश्रीफ म्हणाले,काही कारागृह पोलिसांची अलीकडच्या काळात मलीन झालेली प्रतिमा प्रामाणिकपणाने काम करून बदलावी लागेल.आज जरी कारागृहात शिक्षा भोगणारे कैदी असले तरी ती हाडामासाची,मन,भावना आणि हृदय असलेली माणसच आहेत.तेव्हा त्यांच्यात वर्तन बदल होईल या भावना समोर ठेवून प्रयत्न करायला हवेत. कारागृहात बंदींना वस्तू,फराळ,विविध वस्तू बनविण्यासाठी मिळणारे हे प्रशिक्षण,शिक्षा संपल्यानंतर बाहेर जाऊन उर्वरित आयुष्याच्या पुनर्वसनासाठी उपयुक्त ठरेल.महाराष्ट्रात विविध कारागृहातील बंदीजणांनी बनवलेल्या वस्तूंना बाजारात ग्राहकांकडून मोठी मागणी असल्याचे त्यांनी यावेळी सांगितले.
कारागृह अधीक्षक पांडुरंग भुसारे म्हणाले,महाराष्ट्र राज्याचे गृहमंत्री व उपमुख्यमंत्री देवेंद्रजी फडणवीस,कारागृह विभागाचे पोलीस महासंचालक अमिताभ गुप्ता,जालिंदर सुपेकर, पोलीस महानिरीक्षक स्वाती शेळके यांच्या प्रोत्साहनातून महाराष्ट्रभर असे उपक्रम सुरू आहेत.अशा प्रयोगांमधून कारागृहात शिक्षा भोगत असलेले बंदीजन आणि समाजामध्ये सलोखा रहावा,असा आमचा प्रयत्न आहे. बंदीजणांनी रात्रंदिवस राबून मोठ्या परिश्रमाने या वस्तू तयार केल्या आहेत.
