जनप्रतिसाद न्यूज नेटवर्क.
(अनिल जोशी)
नवी मुंबई आंतरराष्ट्रीय विमानतळाचे काम आता जवळपास अंतिम टप्प्यात आहे.त्यासाठी विमानतळाच्या धावपट्टीची आज चाचणी करण्यात आली.या चाचणीनंतर सुखोई-३० या लढाऊ विमानानेही फ्लायपास केला.लँडींग करणाऱ्या सी-२९५ विमानाच्या वैमानिकाचा मुख्यमंत्री श्री.शिंदे आणि उपमुख्यमंत्री श्री.फडणवीस यांच्या हस्ते सन्मान करण्यात आला.
सी-२९५ विमान हे गांधीनगरहून तर सुखोई हे पुण्यातून आलं होते.यावेळी माध्यमाशी बोलताना मुख्यमंत्री श्री.एकनाथ शिंदे यांनी आजचा दिवस इतिहासात सुवर्णाक्षरांनी लिहिला जाईल असे नमूद करून,या यशस्वी चाचणीचे महत्त्व अधोरेखित केले.विमानतळाच्या दृष्टीने महत्त्वाचा टप्पा पूर्ण झाला आहे.विजयादशमीच्या एक दिवस आधी झालेल्या या कार्यक्रमामुळे सर्वसामान्य नागरिक आणि प्रवाशांसाठी मोठा आनंद आहे.
"मार्च २०२५ मध्ये हे विमानतळ नियमित प्रवासी सेवेसाठी सुरू होईल.वेळेआधीच काम पूर्ण करण्याचा प्रयत्न असल्याचेही त्यांनी यावेळी स्पष्ट केले.तसेच सिडको ने केलेल्या उत्कृष्ट कामाबद्दल सर्व टीमचे अभिनंदन केले.हे विमानतळ सर्वसामान्यांसाठी मोठे आश्रयस्थान बनेल तसेच यामुळे महाराष्ट्राच्या प्रगतीला आणखी वेग येईल असेही मुख्यमंत्री यांनी यावेळी सांगितले.या विमानतळामुळे हजारो रोजगाराच्या संधी निर्माण होतील,तसेच इथे आयटी पार्क आणि व्यावसायिक केंद्रे उभारली जातील असा विश्वास मुख्यमंत्री एकनाथराव शिंदे यांनी यावेळी व्यक्त केला.
